•·.·`¯°·.·• (حـيــاه ســعــيــدة) •·.·°¯`·.·•




اهلا بيك معنا عزيزي زائر منتدي حياه سعيدة
تفضل بالدخول اذا كنت من اسره المنتدي
او تفضل بالتسجيل
اذا كنت ترغب ف الاشتراك معنا وسنتشرف بيك كثيرا


او اعملها اخفاء وريح نفسك

•·.·`¯°·.·• (حـيــاه ســعــيــدة) •·.·°¯`·.·•

منتدى للحب والخير ويارب كل ايامكم تكون كلها حب وخير
 
الرئيسيةالبوابةالتسجيلدخول

شاطر | 
 

 مازال الليل يعاندنى

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
golden eyes
نــائـبة الـمديـر العام
نــائـبة الـمديـر العام
avatar

الهواية :
المهنة :
المزاج :
الدولة :
الاوسمة :
انثى القرد العذراء عدد المساهمات : 2045
تاريخ التسجيل : 07/12/2009
العمر : 24
mms :

مُساهمةموضوع: مازال الليل يعاندنى   الأربعاء ديسمبر 09, 2009 12:05 am

واتمنى القصه تنال اعجابكم
الجزء الاول
==========
يوم الخميس في الصاله ببيت جدتهم اصواتهم طالعه والاطفال مسوين ربشه والبنات سواليف وناس عند التلفزيون...
ديم ماسكه بيبسي حجم عائلي ومعها الكاسات تصب للقبيله اللي جالسه معها
الهنوف: من الغبي اللي جاب البيبسي قدام البزارين..
طنشتها ديم ولا كنها سمعت لان خالتها الهنوف هذا اسلوبها
نوف: ابي شيبس
ام بدر: شوفي بالمستودع او اسالي امي هي هذا مكانها
البزارين ماصدقوا سمعوا خبر راحوا قبلها للمستودع...
ابتهال: ليتكم قلتوا لي كان مريت البقاله وانا جايه وجبت لكم
العنود: لاشوى انك ماجبتي كان صارت حرب عالميه
ديم: سديم تعالي بوسه عمه
نوف: يما منيره في شيبس ولا خلص؟؟
الجده: ايه حاطته بغرفتي بدولاب الملابس..
العنود: ههههههههه يما الله يهديك احد يحط الاكل مع الملابس
الهنوف ومازالت مستمره: من المتخلف اللي جاب البيبسي حنا ناقصين امراض..
ديم وطفح الكيل معها وردت ببرود: أنا اللي جايبته بس ماني متخلفه ولاغبيه احترمي نفسك
الهنوف بقهر: إلا غبيه ونص
الجده: تعوذو من ابليس وانتم هذا حالكم دايم مناقر..عيب هاذي خالتك يا ديم
ديم: يما ماتشوفينها من الصبح تسب فيني والمشكله هي متقصده عارفه اني أنا اللي جايبته
الهنوف: قليله ادب والله لو اني امك لاعطيك كف على وجهك...
ديم: والله لو انتي امي كان انتحرت
ام بدر بحده: ديم عيب هاذي خالتك
العنود: الهنوف لاتحطين راسك براس بزارين خلاص طنشيها..
ديم: ازعجتنا ببنتها كأن محد عنده عيال غيرها...
ابتهال: اذكروا الله...
نوف توها داخله ومعها كيس الشيبس: اللي يبي شيبس يعطيني ريال
محد عطاها وجه وطالعت فيهم حست الجو متكهرب جلست وطبو فوقها البزارين وبعد ماوزعت عليهم وهي مابقى لها شئ...
ريان: ابي بطاطس
جنى بنت الهنوف: هئ هئ هئ هئ
نوف تكلم ديم بصوت واطئ: وش فيكم؟؟
الجده: ياحبك للشر مافيهم شئ
نوف لقطت وجهها: ديم الشيبس خلص مابقى لنا
ديم بصوت واطئ تستهبل: خذي حق جنى بنت خالتك
نوف: هاهاهاهاهاها.. اللحين الاسبوع اللي راح فجرت الدنيا عشان غيرنا القناه اللي تحبها بنتها اللحين وش تبينها تسوى؟؟..
العنود: وش عندكم تتكلمون بصوت واطئ
ديم: سلامتك..
دخل عليهم خالهم احمد هو يتنحنح: السلام عليكم
طبعا كلهم خواته وعيال وبنات خواته إلا ابتهال مرت ولد اخته حطت جلالها على راسها...
احمد عمره 26 سنه ماتزوج امه مالها ولد غيره لان الباقي بنات.. وسيم موظف في البنك
الكل: وعليكم السلام
ديم: هلاوالله خالي وينك تاخرت؟؟..
نوف: من دخلت وهي تسأل عنك حنا ماملينا عينها
احمد: وش تبين يالمصلحجيه؟؟..
ديم: حرام عليك بس والله اشتقت لك اسبوع ماشفتك
الهنوف: وينك احمد سليمان يسال عنك؟؟..
احمد يلف جهه ديم ويتطنز بهمس: لواحلف يبيني اكتتبله بالاسهم
الهنوف: وش قلت؟؟..
ديم: هههههههه
احمد: تسأل عنه العافيه
نوف: ياويلك اعدامك الليله على يدها
الجده: احمد الله لايهينك جب لنا عشاء خواتك بيروحون وهم ماتعشوا..
ابتهال: مايحتاج عشاء ياخاله أنا والبنات نصلح
ام بدر: الله يصلحهم البنات
العنود: مالقيتو إلا ديم ونوف يصلحون عشاء
احمد: وانا ماجي هالبيت إلا جب عشاء جب غداء جب لبن جب حلويات لجنى.. لدرجه اني مسجل رقم البيت عندي " جب خبز"
البنات: هههههههههههههههههههههههههههههه
ام بدر: أنا وش مسجلني اجل.. الله يستر
احمد: لا انتي امي الثانيه مسجلك " حلى المجالس"
وبدو كل واحد من جهه أنا وش مسميني وانا وش مسميني؟؟.. لمن سحبت ديم الجوال من خالها وبدت تدق الارقام وتعلمهم..
ديم قربت لخالها بهمس: خالي منهو هذا اللي مسجله "النشبه"
سحب احمد الجوال منها عشان ماتطلع باقي الفضايح.. لان النشبه سليمان رجل اخته..
الجوهره اكبر اخوانها عندها خمس عيال وبنت وحده اللي هي ديم عمرها 24 سنه المستوى هذا اخر مستوى لها بالجامعه.
===========================
سراب جالسه بالبيت تقلب القنوات ملت مالقت فيه شئ رفعت التلفون ودقت على بنت جيرانهم ورفيقه دربها ديم...
سراب: الو
ديم: هلاوالله..
سراب: بالبيت؟؟..
ديم: تونا راجعين من بيت جدتي
سراب: اكلمك عالثابت
ديم: تستهبلين انتي كنك ماتعرفين اخواني ياويلي لو رفعت السماعه بعد 11
سراب: يو عندي لك سواليف
ديم: مو اكثر مني فاتك قبل شوي خالتي رفعت ضغطي
سراب:أي وحده؟؟
ديم: العله الهنوف حاطه دوبها دوبي
سراب: ياحليك ياديم مغامرات انتم رايحين الادغال مو بيت جدتك
ديم: ههههههههههههههههه والله ماصبرني عليهم الاخالي احمد ونوف وجدتي
سراب: ياحليلها نوف دخلت الجامعه ولاتوها
ديم: إلا اول سنه بالكليه تخصصها ادب انجليزي
وجلست تحكي لها اللي صار بالتفصيل الممل..
دخل على سراب عبد العزيز اخوها
سراب: ديوم عزيز يبيني اكلمك بعدين
ديم: اوكي.. مع السلامه
سراب: مع السلامه
وبعد ماقفلت عبد العزيز اخوها يسألها: من تكلمين؟؟
سراب: ديم
عبدالعزيز: انتي تاكلين تشربين تنامين وديم معك
سراب: اذكرالله لاتنضلنا أنا بنت وحيده وهي بنت وحيده بين عيال ونشترك بصفات عديده احسها اختي مو صديقتي من يوم حنا صغار مع بعض...
عبدالعزيز: اييييييه لاله إلا الله بيتهم كنها ثانويه عيال واحد داخل واحد طالع
سراب: لاتبالغ الكبير ومتزوج الصغير بيبي مايطلع من البيت
عبدالعزيز: اقول ديم صارت اختك لاتصدقين انهم هم بعد اخوانك
سراب: هاهاهاها... بايخ
عبدالعزيز: اللحين بفهم ليش الصديقات اذا كانت علاقتهم قويه مع بعض يقولون حنا خوات مو صديقات والخوات اذا كانوا قريبين من بعض قالوا حنا صديقات مو خوات وبس...
سراب: صح لانه نادر ماتلاقي خوات مره مع بعض الصديقه عاده تكون اقرب...
عبدالعزيز: والله مدري عنكم
سراب وهي قايمه: عن اذنك.. صايره مؤدبه اليوم
عبدالعزيز: وين رايحه؟؟..
سراب: بروح انام.. تصبح على خير
عبدالعزيز: وانتي من اهله.....
سراب صديقه ديم الروح بالروح وبنفس الوقت تصير بنت جيرانهم يعني عشره هم وياهم ماعندها إلا اخو واحد اسمه عبد العزيز عمره 29 سنه
===============================
ديم بعد ماقفلت من سراب بدلت ملابسها وفتحت دفتر خواطرها... او راح عن بالي اقولكم انها انسانه حالمه شفافه مشاعرها رقيقه تحب الخواطر وتكتب من يوم كانت صغيره..
دق جوالها كان رقم بيت خالتها العنود على طول عرفت ان المتصل نوف...
نوف: هلا ديم
ديم: وش عندك مصيبه جديده؟؟..
نوف: ههههه لا بس اذا دقت امي عليك بعد شوي قولي لها كنت اكلمك
ديم: كل يوم على ذا الحال
نوف: ياشينك...
ديم: مشكلتي طيبه وماقدر ارد لك طلب
نوف: يابعد عمري يلا اخليك مع السلامه
ديم: مع السلامه
كان ثامر اخوها مار من عند الباب واول مانهت المكالمه طب عليها..
ثامر: من كنتي تكلمين؟؟؟
ديم: خير ان شاء الله تدخل علي بدون استاذن
ثامر: ردي على سؤالي
ديم: ماراح اقولك
ثامر: بتعلمني بالطيب ولا؟؟
ديم: كيفي جوالي مو جوالك
ثامر سحب الجوال منها وشاف المكالمات الصادره والوارده ورجع لها جوالها بعد ماشاف رقم بيت خالته...
ديم: سخيف...
ثامر بنظرة حادة: بنات يكلمون اخر الليل ..!!
طنشته وماردت عليه...
ثامر: وبعدين وش الملابس اللي لابستها؟؟..
ديم: الظاهر داخل علي بغرفه النوم اكيد بلبس بيجامه
ثامر عمره 23 تقريبا عله يرفع الضغط دايم مناقر هو وياها يحاول يسيطر ويتحكم بكل امورها مسوي فيها فرد عضلات وهي تحاول قد ماتقدر انها تتحاشاه... تخرج من الثانويه ولاكمل دراسته. ومثل ماقلت لكم قبل عندها خمس اخوان بدر وبعده تركي وبعدين ديم وبعدها ثامر وياسر واخر العنقود ريان ثلاث سنوات...
وبعد ماطلع من عندها وهي مرتفع ضغطها منه مسكت قلمها ومارست هوايتها المحببه كتابه الخواطر وخرجت بهذه الكلمات البسيطه لان النعاس غلبها وماقدرت تقاوم..
أبحث
أبحث عمن يجيد لغة الأحاسيس والمشاعر..
أبحث عمن يخلص في زمن قل فيه المخلصون ويفي في زمن قل فيه الموفون..
أبحث عمن يمسك بيدي ويساندني في هذه الحياة لامن يعينني على الصعود ثم يتركني في المنتصف
أبحث وابحث وفي كل مره اتعثر واسقط ولاجد نفسي الاوقعت في حيره جديده اشد واعمق فما اقسى ان تسير على جسر النجاه بلا دليل
لاتعلم مالذي سيواجهك؟؟
او إلى اين ستصل؟!
وماهي النهايه؟!ّ وكيف ستكون؟
ستجد نفسك في دوامه لاتنتهي.. لامفر ولاملجأ لابد من الصراع
تتصارع موجات في داخلك..
ستبقى تساؤلات مجرد تساؤلات.. بلا اجابه
ساظل اعيش في عالم الحيره.. لكن!! إلى متى؟
لادري هل ساغرق في حيرتي؟! ام ساجد من يمد يده لينقذني!!
ولاظن انني ساجد من ينقذني سوى ذاتي..
نعم ذاتي!!!
======================
الساعه 2 الليل دخلت العنود على بنتها نوف وهي باشد حالات الغضب...
العنود: من كنتي تكلمين؟؟..
نوف: ماكلمت احد
العنود: تلعبين على توني واقفه عند الباب اسمع صوتك
نوف ببرود: يتهيأ لك
العنود: من اليوم ورايح التلفون الثابت بشيله من غرفتك تبين تكلمين انزلي الصاله
نوف: اوف انتم كل شئ عنكم ممنوع جوال وماطلعتولي وسكت دايم أنا اقل من الناس..
العنود: بأيش اقل من الناس بمكالمات اخر الليل
نوف: البنات بالكليه يضحكون علي يقولون معقوله ماعندك جوال؟؟..
العنود: الجوال للحاجه مو للترفيه
نوف: شوفي ديم من يوم دخلت الجامعه طلعت جوال
العنود: ياذي الديم اللي هلكتيني فيها...
نوف: خوات وماعندي والثابت وبتشيلونه عني اجلس اللحالي احضر جن احسن لي...
العنود: جن يركبونك ان شاء الله ولك وجه تتكلمين بعد
نوف: ليش وش سويت ؟؟؟!!!!!!!!!!!!!
العنود: زياده عاللي سويته وتسالين ؟؟.. اذكرك بصوره الشاب اللي شفتها عندك.. ولا بمكالماتك المشبوهه اللي من يوم اقرب لك تقفلين....
نايف طالع الدرج سمع اصوات امه واخته دخل عليهم...
نايف: السلام عليكم
العنود: وعليكم السلام
نايف: وش فيكم؟؟؟..
العنود: ابد بس اختك اختباراتها قربت وماذاكرت وزياده على كذا فاتحه الاستريو ومعليه الصوت اخر الليل....
نايف: نوف انتي صاحيه تعلين الاغاني بهالوقت
ماردت عليه اخته طلع وتركهم....
العنود وهي طالعه: احمدي ربك ان اخوك ماسمع شئ
العنود تصير خاله ديم عيالها هم نايف21 سنه ونوف 19 وريوف 10 سنوات
نوف قلبها ابيض وطيبه لابعد الحدود بس مشكلتها مالقت احد يفهمها بالبيت اختها صغيره وامها علاقتها معها مو ذاك الزود....
==========================
الصباح بكافيتريا الجامعه ديم وبشاير يفطرون طبعا هم مع بعض بنفس القسم
" تعليم خاص" اما صديقتهم الثالثه سراب كانت داخله قسم " رياض اطفال"...
بشاير: اوف امس مانمت الامتاخره
ديم: شكل زوجك مسهرك امس ومسوين ليله رومانسيه
بشاير: أي رومانسيه ياشيخه اللي تعيش مع اهل زوجها ببيت واحد تعرف الرومانسيه
ديم: وسعي صدرك اهم شئ عندك زوج يحبك ويخاف عليك
بشاير: وين سراب تاخرت؟؟!
ديم: هي اليوم عندها موعد اسنان تقول بتشد التقويم وتجي....
بشاير: الله يعينها عندها شد تقويم يعني اليوم ماراح تفطر
ديم: اكيد كالعاده يومين تشرب سوائل
بشاير: جبنا سيره القط جانا ينط
ديم التفتت: هلا والله الطيب عند ذكره وانتي الصادقة
سراب: تحشون فيني!!!!!!!
بشاير: اسال عنك تاخرتي
ديم: كيف اسنانك تعورك؟؟
سراب: يعني مو مره... فاتكم انتم اصلا قهروني وللمره الالف غيروا الدكتور حقي
بشاير: الله يعينك
سراب: يوم دخلت قالوا لي الرسيبشن روحي للدكتور ماجد.. وطول الطريق وانا ادعي ربي يارب مايكون سعودي يوم دخلت عليه قالي بصوت ثقيل هلا والله سراب تفضلي.. عرفت انه سعودي جلست عالكرسي وتحجبت جلس يصلح اسناني وبعد شوي عطاني المرايه وهو ينافخ قالي طالعي شكلك ويوم ناظرت والا الكحل واصل لفمي...
ديم: ههههههههههههههههه بعذره خرعتيه...
سراب: ههههههه المهم اكملكم جاء قالي في سوس بين الاسنان عالجيه وبعدين اشد لك.. قلت يلا ماورانا شئ عالجه اللحين... فجأه صرخ علي هاذي مو شغلتي في ناس متخصصين بالاسنان...
بشاير: ههههههههههههههههه تكفين المره الجايه صوريه لنا
ديم: واذا خلصتي من التصوير جهزي الميموري قبل مايكسر جهازك...
سراب: والله يابنات طلعت من عنده والعبره خانقتني..
ديم+ بشاير:ههههههههههههه
بشاير: تلقينه مايعطي البنات وجه يخاف يتعلقون الشباب عليهم حركات...
ديم: ذكرتيني ثامر اخوى رفع لي ضغطي امس
بشاير: خيييييير وش سوى بعد
سراب: اما اخوك هذا احسه رايح فيها
ديم: لا ماعنده سالفه
بشاير: اما ماعنده سالفه وكل هالفلسفه
ديم: هو بس تحسينه عارف حركات البنات ومحد يلعب عليه...
سراب مقاطعه: وش اللي يخليك متاكده انه مايعرف بنات..
ديم: اذكر مره خليت نوف بنت خالتي تلعب عليه ماعطاها وجه فشلها وقالها لاعاد تتصلين على هالرقم...
بشاير: اخوك ذا صراحه غامض
سراب: قرف يابنات اليوم محاضراتي إلى الساعه 3
ديم: اه بس أنا اللي بعمري اللحين متخرجات وانا لي 6 سنين بالجامعه كل ماتذكر السنه ونص اللي راحت علي وانا احوس وانتقل من قسم لقسم يضيق صدري
بشاير: تكفين عاد اللي تخرجوا استفادوا وظايف مافي
سراب: خلينا كذا احسن لان حنا بمجتمع الوحده اللي تتخرج وهي مابعد تزوجت تصير عانس!!
=======================
وبعد الظهر عبدالعزيز وقف عند الجامعه ينتظر اخته.. جت مسرعه ركبت معه
سراب: ياربي حر عطشانه تكفى وقف عند سوبر ماركت
عبدالعزيز وهو يتلفت: حر!!... اخبر لي هندي يبيع عند هالاشاره ماله داعي سوبر ماركت
سراب: الا سوبر ماركت ابي مجله بعد
عبدالعزيز: وش مجلته؟؟..
سراب: مجله " البوح "
عبدالعزيز: وش عندك فيها هالمجله فيه غيرها احسن منها
سراب: لاهاذي غير
عبدالعزيز: كيف يعني غير؟؟
سراب: اذا عرف السبب بطل العجب... ولاتحرجني اكثر من كذا ماقدر اتكلم
عبدالعزيز: تكفين لاحرجك قايلك خطيبك الليله بيجلس معك
سراب: عزيز الله يخليك وقف ابي المجله
عبدالعزيز: هاذاني وقفت بس ماراح انزل لما تقولين ليش هالمجله بالذات
سراب: اوف بقول وامري لله بس بيني وبينك
عبدالعزيز: حشى اسرار دوليه
سراب: ديم نشروا لها هالاسبوع خاطره.. اول مره تتجرأ وتنشر وهي ماتبي احد من اهلها يعرف
عبدالعزيز: يعني أنا وش شايفتني بهز طولي واروح بيتهم اعلم اخوانها
نزل جاب لها العصيرات والمجله اللي طلبتها ...
===========================
بدرعمره 28 ملتزم متزوج عنده بنت اسمها سديم عمرها سنتين وزوجته ابتهال معلمه في احدى الثانويات لماده الدين...
بدر: لازم اروح لاهلي بكره ماشفتهم هالاسبوع
ابتهال: يوم الخميس ببيت جدتك كلهم يسألون عليك...
بدر: خلاص نروح كلنا بكره...خلصي كل اشغالك عشان لاجينا نروح مايكون وراك شئ
ابتهال: ان شاء الله.. بس عندي محاضره بلقيها بالمصلى على الطالبات عساني اقدر اخلصها عشان اروح..
بدر: واذا ماخلصتي مو مشكله باخذ سديم واروح
ابتهال: ههههههههههه اكيد بتاخذها تبي ديم تنهبل علينا ان ماشافتها
بدر: ياحليلها ديم تذكرين يوم انولدت قالت سموها سديم عشان يصير قريب من اسمي
ابتهال: واللحين ماقصرت معها تحبها وتلعب معها دايم
بدر: الله يديم عليهم... وش موضوع محاضرتك الجايه؟؟..
ابتهال: عن "هجر القران الكريم"...
بدر: والله تمام موضوع حلو
ابتهال: مو حنا في المدرسه حاطين صندوق اقتراحات وشكاوي.. صراحة تفاجأت من بعض الطالبات تقول ما أفتح القرآن إلا للمدرسة!! .. واللي تقول أقرأه من غير استيعاب .. والثانية القرآن ما تعرفه إلا برمضان .. انقهرت انهم عايشين ببلد الحرمين وهذا حالهم ...
بدر: أيه والله .. بس أسهل طريقة لعدم هجر القرآن انه بعد كل فرض يقرا له الواحد صفحتين .. وبكذا يختم القران بشهر ..
ابتهال: ايه هذاني جمّعت مطويات كثيرة .. وابوزعها وان شاء الله تجيب فايد
بدر: الله يجعله في ميزان حسناتك...

وهذا الجزء الثاني
يلا نبتدأ
===========

نوف جالسه بغرفتها وتفكر بالف فكره عشان تطلع من الوضع اللي هي فيه رفعت السماعه ودقت الرقم تنتظر اجابه من الطرف الاخر.....
نوف: الووووووو
......: هلا والله
نوف: وش اخبارك؟؟..
.......: تمام
نوف: خلاص اليوم أنا طفح الكيل معي وبخربها قبل كم يوم امي دخلت علي بالليل وتهاوشت أنا وياها....احس اني طفشت من حياتي ياهند
هند: ههههههه قايلتلك أنا مافي إلا حل واحد
نوف: خلاص تكفين بكره دبري لي مااجي الاوهومعك
هند: ابشري من عيوني بس تراني مفلسه جيبي فلوس معك
نوف: اوكي... بس لاتنسين
دخلت امها عليها....
نوف: يلا مع السلامه اشوفك بكره
.......
العنود بنظرات شك: من كنتي تكلمين؟؟
نوف: صديقتي هند
العنود بعد ماجلست : يوم الاربعاء معزومه بتروحين معي؟؟
نوف: لامالي خلق
العنود: اجل روحي عند خالتك تلاقين ديم اجلسي معها
نوف وهي قايمه: ان شاء الله...

رفعت العنود السماعه واتصلت على بيت اختها الهنوف
الهنوف: الوووو
العنود: السلام عليكم
الهنوف: هلا وعليكم السلام
العنود: وش اخباركم؟؟.. وش اخبار جنى؟؟..
الهنوف: كلنا بخير انتم وش اخباركم
العنود: الحمدلله.. الهنوف بسألك بتروحين بعد بكره للعزيمه
الهنوف: اكيد بس بنتي مابيها تجلس عند الشغاله الحالها بخليها عند امي
العنود: أنا بخلي نوف تروح بيت الجوهوه جيبي جنى عندها
الهنوف: ليش تودينها عند ديم والله اللحين بنتك تتعلم طواله اللسان منها والحركات اللي مالها داعي...
العنود: ياشيخه ديم ماعليها بس انتي الله يهديك مدري وش فيك عليها
الهنوف: والله هي قليله ادب ماتربت

وبدت الهنوف تسب بديم وتطلع سوالف قديمه... تتوقعون اني ابالغ ومافي خاله تكره بنت اختها كذا؟؟!!... والله موجود خالات من هالنوعيه اللي بيعيش ياما حيشوف...

الهنوف خاله ديم الصغيره عمرها 30 سنه عندها بنت وحده عمرها ثلاث سنين

========================

وبمكان اخر ببيت ابوطلال... بغرفتها توها راجعه من السوق تقيس ملابسها دخلت عليها امها..
ام طلال: وش تسوين؟؟..
بسمه: اجرب الملابس.. التنوره احسها ضيقه ببدلها بكره
ام طلال تفتش الاكياس: هذا حلووو لونه
بسمه: بس الله يستر لايطلع مو مقاسي
ام طلال: البلوفر هذا عفش مو حلو
بسمه: والله؟؟..
ام طلال: ماعجبني
بسمه: ايه لو ديم حبيبه قلبك اللي لابسته كان قلتي يجنن
ام طلال: هههههه ياحبيلها ديم تغارين منها؟؟
بسمه: ايه والله صراحه الواحد يغار
ام طلال: ديم تحبب الواحد فيها
بسمه: شوفي الصراحه ديم حبوبه وقلبها طيب بس مايقهرني إلا حبك الزايد لها...
ام طلال: بنت اخوي الوحيده ولازم احبها
بسمه: الله لنا
ام طلال: بروح بعد شوي بيت اخوي تروحين معي؟؟
بسمه: لازم نروح يمااااااا
ام طلال: ايه خالك من زمان ماشفناه فرصه انه موجود اليوم نسلم عليه

عمه ديم عيالها طلال عمره 25 سنه وبسمه 20 سنه
امهم تحب ديم وتغليها غلا مو طبيعي وبسمه علاقتها فيها عاديه احيانا ضحك وهبال واحيانا حساسيه ورسميه بس هي تغار منها لحب امها الكبير لها...


وبعد ماراحوا بيت ابو بدر استقبلتهم ام بدر وبعد شوي نزلت لهم ديم..
ام طلال بابتسامه: هلاوالله بنور هالبيت
ديم: هلابك ياعمه وين الناس من زمان عنكم
بسمه: نتحراكم انتم تجون بس شكلنا ماوحشناكم
ام بدر: والله يابنيتي انكم عالبال بس الدنيا مشاغل
بسمه: بس ياديم في اختراع اسمه تلفون
ديم: صح في ذي غلبتيني
ام طلال: ديم صابغه شعرك؟؟
ديم بحياء: ايه
ام بدر: ايه تبي تخرب شعرها ويمتلئ شيب وهي توها
ام طلال: بس والله يجنن بسم الله عليك انتي اللي تحلين الصبغه مو هي اللي تحليك
بسمه: يماااااااا نفس لون صبغتي.. مااشوفك مدحتيني يوم صبغت
ام طلال: لاتختلف هي شعرها اطول وطالع احلى عليها... يابخت اللي بيخذها
ديم تحاول تصرف: حتى شعر بسمه ياعمه مره حلووو
دخل عليهم ابوبدر: السلام عليكم
الكل: وعليكم السلام
ابوبدر: وش اخبار ابوطلال وينه ياكافي ماينشاف؟؟.
وراح وقتهم بالسواليف والسؤال عن الحال والبنات بالضحك والتعليقات وام طلال من حبها لديم تتمناها زوجه لولدها ودايما تلمح بهالشئ بس ديم تسوى نفسها مافهمت مو عن شئ هي تحب عمتها وتعزها كثير بس فكره انها تاخذ ولدها شايلتها من بالها....

بعد ماطلعت عمتهم الساعه 10:20 عند التلفزيون...

ابوبدر: حطوا عالاخبار
دق تلفون البيت رد عليه ياسر..
ياسر: يما التلفون خالتي الهنوف تبيك
قامت ام بدر تكلمها بالصالون الثاني ..
ام بدر: الو
الهنوف: هلا والله
ام بدر: هلابك وش اخبارك؟؟
الهنوف: بخير الله يسلمك وانتم كيفكم..
ام بدر: بخير.. امي وش اخبارها؟؟.. لي كم يوم مامريتها
الهنوف: امس كنت عندها ماعليها بخير
ام بدر: عاد انتي خفيفه ماعندك إلا بنيه سهل الروحه والجيه أنا ماالاقي وقت
الهنوف: الله يعين... اقول الجوهره امس ادق عليكم باليل التلفون مشغول ديم وراها ماتكلم من جوالها...
ام بدر: هههههه لامايكلمون اكيد شابكين نت
الهنوف: لايكون تخلون ديم تشبك نت بانصاص الليول ترى النت يخرب البنات
ام بدر: لا الحمدلله ماتشبك الانادرا هذا ثامر اللي مستلم الخط بالليل
الهنوف: اييييييه اهم شئ انتبهي لديم النت مليان بلاوى
ام بدر بملل من نصايح اختها المستمره: الله يصلح الجميع...
وبعد ماقفلت رجعت لعيالها..
ام بدر: الهنوف تسلم عليكم
الكل: الله يسلمك ويسلمها
ياسر: وش اخبار بنتها الدلوعه
ديم: الحمدلله مو أنا الحالي مرتفع ضغطي من بنتها
ام بدر: اليوم ام هشام داقه علي تقول زواج ولدها الشهر الجاي
ابو بدر: ياحليله هشام بيتزوج!!
ياسر: مااحبها ذا الحرمه
تركي: هشام!! والله وكبرنا وصرنا نتزوج
ثامر: كم عمر اللي بياخذها؟؟
ام بدر: وش فيكم تطنزون على صديقتي وولدها
ياسر: يما توه صغير
ام بدر: ارحمنا يالكبير عمرك 15 وتقول هالكلام اجل لو كبرت وش بتقول
ابوبدر: ههههههههه هذا جزاه اللي يغتاب الناس بغيابهم
تركي: بفهم بزر ومزوجينه ليش
ثامر: ههههههه عمره 20 وبيتزوج
ابوبدر: وأنتم اللي بتصرفون عليه
ثامر: لابس يبا المفروض اهله مايعطونه وجه يدرس ويتزوج المفروض ينتظر
تركي: وين بيسكن؟؟
ابوبدر: يقولون ماجرين له شقه
ثامر: قسم بالله مبزره اخر زمن توه مافقس من البيضه وبيتزوج
ياسر: اتخيله بعد سنه شايل ولد معه ويقول للناس هذا ولدي احسهم بيقولون بلا نصب اخوك الصغير
ثامر: هو خط شاربه ولاتوه؟؟
العيال: ههههههههههههههههههههههههه
ابو بدر: عيب عليكم هالكلام
ام بدر: هذا نصيب الولد لاتطنزون
ابوبدر: يالله تصبحون على خير بروح انام
ام بدر: وانتم يلااااا ياسر وراك مدرسه
ريان: وانا ماما بعد...
ديم: امووووت انا عاللي مايعرفون يعبرون
ثامر: أنا بطلع عندي مشوار وراجع
وبعد ماطلع الكل ينام مابقى إلا ديم وتركي...
تركي: امس في احد جاء عندنا البيت
ديم وفهمت تسحيبه: ايه عمتي وبنتها
تركي: اهاااا
ديم: بطلع غرفتي اجهز ملابس بكره
تركي بتردد: نوف وش اخبارها؟؟...
ديم: تمام ماعليها
لحظات صمت بينهم...
ديم بلكاعه: طيب اسأل عن بسمه بعد
تركي: هاهاها دمك مره خفيف
ديم: تصبح على خير بروح انام
تركي عمره 26 سنه تركي عنده شلل اطفال بوحده من رجوله وهالشئ معه من يوم ماانولد بس الحمدلله مايجلس على كرسي ولاشئ يمارس حياته الطبيعيه ورجله يسحبها لمن يجي يمشئ يعني اي واحد بيشوفه يلاحظ ان في عرج او رجله فيها شئ بس الحق يقال الولد مملوح مهندس اعاقته مامنعته من شق طريقه واكمال دراسته ودخول التخصص اللي كان يحلم فيه مع انه احيانا كان يحس باحراج من نظرات الناس له لكنه مع الوقت تعود على هالنظره... يحب نوف بنت خالته حب من طرف واحد وديم مضايقها هالشئ لانها عارفه ان بنت خالتها عايشه بعالم ثاني وكم مره حاولت تلمح لها بحب اخوها لها بس مالقت أي تجاوب منها عشان كذا تحاول ماترد على اسئلته عنها وبنفس الوقت حاز بنفسها هالشئ تتمنى لاخوها وجده تبادله نفس المشاعر..

قبل ما تطفئ النور فتحت دفترها الوردي تسجل فيه لو سطرين قبل ماتنام لانها مستحييل تترك هالعاده والكتابه تمشي بدمها..

احلام وردية..

طقوس جوية..

قد تكون حارة جافة طوال العام..

وقد تكون..

باردة ممطرة في كل فصول الزمان..

اعيش لحظة فرحه .. تتبعها احزان الضحكة
ارى البسمة .. تتبعها احلام موردة

جلّ ما اسمعه .. دعي الأحلام بعيدة

الأحلام لمن يحققها !!

الأحلام لمن يريحها !!

الأحلام ليست لإنسان مثلي .. الأحلام ما تُكتب
الأحلام لن تكون فقط بقلبي .. الأحلام يأتي لها يوم وتتحقق

وانا احلامي كثيرة..
اعدها لاتنتهي ..
انتظر لحظة فرقاها لا استطيع..

تهمس لي .. انا احبك ولن افارقك..
الكل يتركني ايام الرتابة..
الا أنت معي حالك من حالي..

اضحك واجاري نفسي..
واقول وجدت احد يعشقني..

ترد علي بقولها..

حبيبتي لا يمكن ان نفترق..
نحن روحين بجسد..

ابتسم وتتسع الابتسامة..

ارد عليها بقولي

أحبك يا أحلامي احبك ..
حب المغترب لأرض الوطن..
حب البخيل للفلس..
أحبك ..

هل تعلمي الى اي مدى احبك؟؟..
أحبك
حب الحبيب لحبيبه..

وهنا بهذه اللحظة
ضحكت احلامي..

وعلمت ان ما الفراق بيننا محال..

**( غموض انثى )

=============================

الظهر بعد مارجعت من الكليه دخلت غرفتها وقفلت الباب وراها فتحت شنطتها وطلعت جهاز جوال جديد دخلت فيه الشريحه وفي بالها الانتقام من اهلها مثل ماحرموني من الجوال بطريقتي الخاصه قدرت اجيبه.. امي تحسب انها حرمتني من الثابت خلاص ماراح اقدر اكلم الاتحت نظرها..
قعدت تقلب بالقائمه وتسجل بعض الارقام لمن سمعت صوت الباب حطت الجهاز عالسايلانت ودخلته الشنطه...
نوف: ميييييين؟؟
ريوف: أنا افتحي
نوف بعد مافتحت: نعم وش تبين؟؟..
ريوف: ماتبن غدا
نوف: لاشبعانه
ريوف: امي تقول ناديها
نوف: قولي لها بنام اذا قمت بأكل
ريوف: كيفك
ريوف زي ماقلت لكم عمرها عشر سنوات دلوعه امها ترفع الضغط أي شئ تشوفه تركض تقول لامها وكل مصايب نوف من تحت راسها عشان كذا هي حذره مع اختها لابعد الحدود....

===========================

قامت ديم من النوم المغرب ونزلت كانوا اخوانها بالصاله تركي وثامر وياسر وطلال والصغير ريان سلمت وجلست..
تركي: ديم شكلك متغير اليوم
ديم: من أي ناحيه يعني؟؟
تركي: وجهك في شئ؟؟...
ياسر: اكيييييد حاطه مكياج
ديم: يازينك ساكت
ثامر: اييييييه تعالي وش مصلحه بحواجبك؟؟
تركي: حافتهم؟؟!!!
ياسر: وش يعني ؟؟..
ديم: ليش تبوني اصير ملعونه احف حواجبي
ثامر: لاتلعبين علينا واضح انك شايلتهم
ياسر: شكلك كل يوم تشيلين شعرتين تمويه عشان نحس انهم عاديات
تركي: ايه شكلهم مو طبيعي
ديم: خل اروح غرفتي اصرف لي مسوين مكتشفين
تركي: مافي روحه تعالي علميني وش مسويه؟؟..
ثامر: انتي الظاهر ماينفع معك الابدر وزوجته يجلسون معك ويعطونك محاضره...
ديم: ليه شايفني فاسقه ولاخرجت من مله الاسلام
تركي: واللعن شوي بنظرك
ديم: يوووه منكم مشقره حواجبي ارتحتوا
ثامر: نفس الحف تحددين الحاجب
تركي: مدام السالفه كذا أنا اطلع منها من قال لااعلم فقد افتى
سمعوا صوت الباب الخارجي يفتح كان بدر وابتهال ومعهم سديم....
بدر: السلام عليكم
الكل: وعليكم السلام
ديم: هلاااااااا بسدوم.. تعالي بوسه عمه
العيال طلعوا من الصاله عشان مره اخوهم تاخذ راحتها وبعد شوي جاء ابوبدر وام بدر..

المغرب وقت القهوه تجمعوا كلهم..... بعد ماتقهوو....
ديم: يماااااا بروح عند سراب
ام بدر: ماتستحين انتي كل يومين عندها
ابتهال ماسكه جلالها: عادي ياخاله بيتهم قريب...
ثامر: وليه هي ماتجي؟؟
ديم: ماشاء الله حنا بيتنا كله عيال وهي اخو واحد ودايم طالع
ثامر: حتى ولووو....
ابو بدر يقاطعه: كم مره أنا قايلك اذا أنا كنت موجود مالك شغل باختك
تركي: يبا ثامر صادق غلط روحاتها لهم كل وقت
ياسر: حتى أنا اتفشل عند عيال الجيران شكلهم يقولون اختهم كل يوم طالعه
بدر: انتم وش فيكم عليها اذا هي مو مسويه شئ حرام
ديم تبتسم لبدر: هااا وش قلتي يما؟؟
ام بدر: شوفي ابوك وش رايه؟؟
ابوبدر: روحي يابنيتي الله يسهل امرك
ثامر مرتفع ضغطه: يبا هي مو مخربها إلا دلعك لها
ابوبدر: هذا وهي اختك الكبيره اجل لو كانت اصغر منك وش بتسوي
بدر: وبعدين أنت وش حارق رزك لاجاك بنات لاتدلعهم
ياسر: اجل أنت بتدلع سدوم
ديم: ياحبيلها سدووووووم محد يسواها
ريان: وانا بعد ياتيومي
ام بدر: ريان وااااااااااااااااااااااو ياناس أنت قطعه من قلبي
ابتهال: هههه الله يخليه لك ياخاله
راحت ديم غرفتها ولبست بنطلون جينز وتيشيرت ابيض ونزلت وطلعت من الباب الخلفي عشان اخوانها مايشوفون ملابسها ويتفلسفون عليها...

وبعد مادخلت ديم بيت جيرانهم استقبلتها ام عبد العزيز وراحت تنادي لها سراب....
سراب بصوت عالي: مرحبا بالحلوين
ديم: بدري توني برجع لبيتنا
سراب: والله كنت اخذ لي شور انتي ماعلمتيني انك بتجين بدري...
ديم: عادي قلت البساط احمدي ماتوقعت انك بتسوين زحمه وتتروشين
سراب: ههههههه مو عشانك متروشه بس جيرانا من الجهه الثانيه دقوا علينا قالوا في ريحه خايسه طالعه من بيتكم واضطريت اتروش

===========================

يوم الاربعاء الساعه 8 مساء... نوف واختها بالمدخل عند بيت خالتها لابسه عبايتها والطرحه على كتوفها..
ديم: يااختي تاخرتي وينك؟؟
نوف: ريوف ادخلي جوه عند التلفزيون
ريوف تطالع ديم: وين ريان؟؟
ديم: داخل
نوف بعد ماراحت اختها: اسكتي مابغيت اجي العله خالتك محرشه امي عليك كالعاده
ديم: حسبي الله عليها رافعه ضغطي لامرتاحه منها لاهي قريبه ولابعيده
نوف: ماعليك منها هي غيرانه منك..
ديم: نفسي مره اجلس معها من غير هوشه
نوف وهي تطلع شئ من شنطتها: اخيرااااا..
ديم: جوال!!!!!!... اخيرا طلعتي
نوف: الصراحه محد من اهلي يدري مطلعته من وراهم امي كل شئ حارمتني وكل يوم مطلعه قرارات جديده وتراقبني بكل شئ...
ديم: بس هذا مو معناته انك تعرضين نفسك لمشاكل انتي بغنى عنها...
نوف: احبه ياديم احبه مااقدر يمر يوم من غير مااسمع صوته
وبهاللحظات كان تركي طالع من الصاله متجهه للباب الخارجي وطاحت عينه بعين نوف ومن الصدمه وقفوا الثلاثه من غير أي حركه تركي مصدوم ونوف من المفاجئه وديم من خوفها ان اخوها سمع كلامهم..اخيرا استوعبت ديم ودفت نوف للمجلس وطلعت بتشوف اخوها لقته طلع.
نوف: تتوقعين سمعنا
ديم بتوتر: والله مدري... امشي نطلع غرفتي
وبعد ماطلعوا الغرفه وجابت لهم الشغاله العصير...
ديم: نصيحه مني حاولي باهلك يطلعون لك جوال بدال مايدرون انك مطلعه من وراهم وتصير سالفه...
نوف: حاولت معهم الف مره يقولون انسي
ديم: تذكريني أنا اول مادخلت الجامعه اخواني حلفوا اني ماامسك جوال قالوا الجوال يخرب البنت وماله داعي بس حبه حبه لما اقنعتهم.. اصبري الصبر مفتاح الفرج
نوف: أنا وضعي غير وضعك..
ديم: يزيد يدري انك طلعتي؟؟
نوف: ايه
ديم: وش قال؟؟
نوف: بالبدايه عارض وقال اخاف اهلك يصيدونك وبعدها مااسمع صوتك ابدا بس لمن شافني مصره قال انتبهي وخليك حريصه..
ديم: اللحين هو خايف عليك يقولك كذا...
نوف: انتي وش رايك؟؟
ديم: شوفي انتي من كلامك لي دايم عنه احس انه يحبك بس هذا مو كافي.. اذا هو شاريك صدق خليه يجي يخطبك..
نوف: في كذا عقبه بطريقه اول شئ باقي له ترم ويتخرج من الجامعه ثاني شئ اهلي ماراح يرضون أنا متاكده...
سكتت ديم وهي تفكر بحل لبنت خالتها عشان تطلعها من هالمشاكل اللي بتحط نفسها فيها...

=======================

الساعه 9 مساء... ثامر وهو طالع لقى خاله احمد عند الباب...
ثامر: هلاوالله بخالي.. تفضل
وبعد مادخله للصاله...
ثامر: وين الناس من زمان عنك؟؟
احمد: هلابك... وين الناس أنا الخال الحق لي
ثامر: مدام الحق لك وش عندك جاينا
احمد: لايكون بيتك وانا مضيع...
ثامر: عما قريب ان شاء الله
احمد: وش اللي عما قريب بتذبح اهلك وتارثهم
ثامر: لااااا بتزوج
احمد: ههههههههههههههه حلوه
دخلت ديم: هلا هلا هلا البيت منور اثاريك عندنا
احمد: شف الناس اللي تعرف ترحب مو أنت... ديم تعالي شوفي اخوك بيتزوج
ثامر: وش فيك تتطنز أنت شايب وماتزوجت إلا الان تحسب كل الناس مثلك
ديم: هيييييي هييييي أنت حدك خالي هو يشر بس والبنات يتمنونه
احمد: بعد عمري والله ديم
ثامر: والله ان جيت للحق أنا وسيم اكثر منك
احمد وديم: هههههههههههههههههههههههههه
ديم: أنت الدعوه مو وسامه وبس خالي جسم وطول وملح ووظيفه بالبنك وراتب يملئ العين...
ثامر: أنا بس خلوني اتوظف والله لاغطي عليه ونصير نخطب مع بعض ونخير البنات بينا وتتحدوني اذا مااختاروني..
احمد: لا ارتاح من اللحين أنا اذا جوو يخطبون لي ابي وحده نص ديم ماابي مثلها لاني متاكد ماراح احصل...
ديم انحرجت: يؤ يؤ يؤ تركت نوف فوق الحالها بطلع لها
ثامر: يقالك استحت اللحين ترى يلعب عليك
احمد: وين امك؟؟
ثامر: معزومه
احمد: ديم اجل نادي نوف وتعالوا تحت
ديم: وثامر
احمد: يلااااااا توكل كان بتطلع ولاشئ بجلس مع بنات اختي
ديم: اوووووف قويه والله مايعرف له إلا أنت ياخال
ثامر: خليها تنزل بعباتها ونجلس ونفلها اليوم.. مو بالسوق عادي تتمشون بعبايات...

الرجوع الى أعلى الصفحة اذهب الى الأسفل
golden eyes
نــائـبة الـمديـر العام
نــائـبة الـمديـر العام
avatar

الهواية :
المهنة :
المزاج :
الدولة :
الاوسمة :
انثى القرد العذراء عدد المساهمات : 2045
تاريخ التسجيل : 07/12/2009
العمر : 24
mms :

مُساهمةموضوع: رد: مازال الليل يعاندنى   الأربعاء ديسمبر 09, 2009 12:07 am

الجزء الثالث
=========

بغرفتها ترتب ملابسها بالدولاب دخل عليها ابوها..
ابوبدر: السلام عليكم
ديم: هلا يبا.. تفضل نورت الغرفه
ابوبدر يجلس عالسرير: وش اخبار الدراسه؟؟
ديم: ماشين.. اخر مستوى دعواتك لي
ابوبدر: الله يوفقك ويسخر لك ولد الحلال اللي يسعدك.. المهم اسمعيني جايك اليوم أخذ رايك بموضوع..
ديم: خير يبا
ابوبدر: عمتك خطبتك لولدها طلال
ديم وعلامات التعجب مرتسمه على وجهها: طلال!!
ابوبدر: ايه طلال فكري بالموضوع وتاكدي ان اللي تبينه بيصير محد راح يجبرك على شئ وانا موجود..
ديم: الله يخليك لنا يبا
طلع ابوها من عندها هي ماكانت مستغربه من السالفه لان عمتها دايم تلمح لهالموضوع وتدري انها تسوى عيون عمتها لكن كانت متفاجئه لانها ماتوقعت دخلت ابوها عليها بهالوقت.
طلال!!.. عمري ماتخيلت يكون زوجي وحتى ان تخليت هالشئ اكره نفسي موشين في الولد لكن شئ بنفسي ماابيه يكون من نصيبي الله يوفقه مع وحده غيري.. انسدحت عالسرير وسبحت في بحور احلامها يارب أنا طموحي غير اتمنى اخذ واحد اكبر مني عالاقل بسبعه سنين ابيه يدلعني ويدللني ابي اكون بنظره صغيره وغير كذا أنا من زمان رافضه فكره اني اتزوج قريب لي أنا ابي اعيش حياة جديده نفسي ادخل على مجتمع ثاني ابي احس بالتغيير وانا حياتي تغيرت ماابي اعيش حياه ممله لكن!!! أنا مره متفائلة مو كل شئ يتمناه الانسان يتحقق ولاكل مانبيه نحصله.. لكن طلال لاااا ماابيه.. بس هذا رابع واحد يتقدم لي وارفضه اخاف يروح عمري واندم عاللي رديتهم ااااه مابقى لي إلا ترم واتخرج وبعدها مدري وش بيكون مصيري؟؟..
مسكت دفترها الوردي وفتحته تكتب فيه بعض خربشاتها..

كم احزنتني ايها الليل.. كم ضاعت لحظات في قلبك المخيف.. مازلت اعيش رهبته.. اقلب صفحات الألم والشكوى وارسم الاهات للوحه من اصل واقع مرير.. عشت وقتا ليس وقتي وزمنا ليس اعهده لي.. كم من دمعه غاصت في بحور اوجاعي فجلست الملم شتات ذكريات لم تبق منها إلا صرخه مدفونه في خاطري..
كيف سيكون مستقبلي الاتي؟!!

=======================

الصباح ام احمد تقوم احمد من النوم عشان يلحق دوامه والاخ نومه ثقيل الله يعظم اجر امه عليه...
ام احمد: قوووم الوقت تاخر
احمد من تحت الغطاء: الساعه كم؟؟
ام احمد: 8 وأنت دوامك يبدأ 8 ونص يالاااا بتلحق تفطر وتطلع
احمد: امممم طيب
نزلت ام احمد بعد ماشافت ولدها تحرك ودخل دوره المياه...
وعالفطور.. حطت الشغالة التوست والأكواب وهي تطالع بأحمد نظرات غريبة ...
احمد: وش عندها هاذي تناظرني؟
ام احمد: حتى أنا ما غير تقز فيني
احمد: زودتها عاد .. نظراتها شوي وتاكلني
ام احمد: اسكت بس لا تحاكيها اللحين تروح مثل اللي قبلها
احمد يغير الموضوع: يووو يما كل يوم حليب كان صلحتي شاهي
ام احمد: الشاهي ينشرب كل وقت اما الحليب مافي إلا الصبح
احمد: ماشاء الله حكيمه امي
ام احمد: وأنت جاي الظهر جب معك زيت
احمد: يماااا الاسبوع اللي راح جايب معقوله خلص؟؟!!!!!!!!
ام احمد: لا ماخلص بس أنا ابي زيت لشعري
احمد: يماااا وانتي من متى تحطين زيت بشعرك
ام احمد: ياوليدي اشوف ام عبدالله شعرها اكثر واحسن من شعري يوم سألتها قالت انها كل اسبوع تحط زيت
احمد: ههههه ايه قولي كذا السالفه فيها ام عبدالله.. وانتي يمااا أي شئ تشوفينه عند
ام عبدالله ولاام صقر تبين زيه

=========================

ابتهال طالعه من غرفه المدرسات وتحس بالارهاق لان جدولها اليوم مضغوط كان عندها خمس حصص كانت متجهه لدروره المياه بتجدد لصلاه الظهر بس استوقفها حديث دار بين ثنتين من طالباتها ووقفت تسمعه وسوت نفسها تقرأ لوحه الاعلانات القريبه منهم..
الطالبه الاولى: يلاااا نصلي.. انتي ليش ماتصلين أنا ماعمري شفتك تصلين؟
الثانيه: أنا مااصلي بالبيت عشان اصلي هنا..
بكل وقاحه تقول هالكلام أنا مااصلي تحس بفخر بهالشئ عاجبها ان مايحكمها فروض.. هذا الكلام كان يدور في بال ابتهال انتظرت البنات لما خلصوا كلامهم وترددت تنادي البنت وتنصحها ولاتتركها بس بالاخير قالت ربي اللحين بيعاقبني وبيكوت هالشئ حجه على عند ربي اني سمعت هالكلام وشفت هالمنكر وماغيرته المفروض كلنا المعلمات نكون مربيات قبل معلمات لازم يكون دورنا اكبر من التلقين قربنا من البنات هو اللي يبخليهم يفتحون لنا قلوبهم عشان نحل مشاكلهم.. انتبهت ابتهال على ان البنات انهو حديثهم وبدوا يمشون وقبل مايبعدون عنها اكثر نادت الطالبه الثانيه اللي اعترفت بعظمه لسانها انها ماتصلي بس هي ماتعرف اسمها مع انها طالبه عندها حاولت تعصر مخها تطلع الاسم بس ماطلع معها شئ..
ابتهال: لو سمحتي..
الطالبه: أنا استاذه!!
ابتهال بابتسامه: ايه ممكن شوي
قربت الطالبه وهي تتسأل: نعم استاذه
ابتهال ماودها تتكلم بالممر وتحرجها قدام الطالبات: تعالي معي شوي ابغاك
ومشوا لما وصلوا لغرفه المشرفه وكانت فاضيه دخلت ابتهال وقالت للبنت تجلس بالبدايه البنت كانت مستغربه بس باسلوب ابتهال اللطيف وابتسامتها العذبه خلاها تستسلم وتجلس..
ابتهال: أنا صراحه ناسيه اسمك بس اللي اعرفه انك طالبه مجتهده وعمرك تقريبا 17 او 18 والسنه هاذي بتتخرجين صح ولا لا؟؟
الطالبه: صح واسمي سماح
ابتهال: أنا قبل شوي وانا طالعه سمعت شئ ضيق صدري
الطالبه تغير لون وجهها: وش سمعتي استاذه؟
ابتهال: صحيح ياسماح انتي ماتصلين؟!
سماح: لا من قال؟
ابتهال: أنا سامعتك باذني هاذي.. اللحين مستحيه مني ولااستحيتي من ربك
البنت نزلت راسها..
ابتهال بصوت حنون: اللحين كيف تبين ربي يوفقك باخر سنه لك وانتي ماتصلين؟؟..
الرسول عليه الصلاه والسلام يقول:" العهد الذي بيننا وبينهم الصلاه ومن تركها فقد كفر" .. ترضين تكونين كافره؟؟
البنت مازالت منزله راسها ولارفعته ابدا..
ابتهال تكمل: مافي قربه بعد التوحيد يتقربها العبد من ربه اكبر من الصلاه.. صلي قبل ان يصلى عليك.. تدرين ان تارك الصلاه لايصلى عليه ولايغسل ولايكفن ولايحمل على الرقاب ولا يدفن بمقابر المسلمين..
البنت انصدمت من كلام ابتهال
ابتهال مازالت مستمره بالنصيحه: تدرين ان تارك الصلاه اذا مات يجر على وجهه ويحفر له حفره في الصحراء يكب فيها على وجهه؟؟.. والاعظم والادهي من ذلك انه لايدعى له ولايستغفر له.. ياسماح زي مو ربنا غفور رحيم هو بعد شديد العقاب الله وعد اللي يتهاون بالصلاه ب" غي" وهذا وادي في جهنم عظيم قعره شديد حره لو سيرت به جبال الدنيا ذابت من شده حره هل راح تقوين على هذا؟
اجهشت البنت بالبكاء اعطتها ابتهال مناديل تمسح فيها وهي تهدي فيها
ابتهال: ربي خلقنا ورزقنا الماكل والمشرب والملبس والنعم العظيمه كل شئ حولنا نعمه وجودنا بين ام واب نعمه البيت اللي نسكن فيه نعمه الامن والامان نعمه ابعدنا الله عن الحروب وصوت القذائف والقنابل هاذي بعد نعمه ليه حنا مانشكر ربنا على هالنعم؟؟ ليه حنا مقصرين بحق ربنا هو يرزقنا كريم جواد معنا وحنا مانحمده ولانشكره!!!!!!!!!

============================

سراب جالسه بالملحق الخارجي اللي مخليته معمل لها وجالسه تسوي فيه بعض الاعمال والالعاب حقه الاطفال لان عندها نشاط بكره بالجامعه وبما ان تخصصها رياض اطفال فهالاشياء صارت اشياء روتينيه بحياتها وماكان يمر اسبوع إلا وهي تحوس وتطلع تكمل باقي اغراضها.. تذكرت انها مااخذت لها موعد لتقويم الاسنان اللي المفروض هالاسبوع تروح له دخلت البيت غسلت يدينها وراحت المطبخ..
سراب: مساءك سكر يما
ام عبدالعزيز: الناس يقولون السلام عليكم
سراب وهي طالعه: اه بس منكم انتم ماتقدرون الرومانسيه أنا لو بتزوج وزوجي رجعني عندكم ترى كله من تحطيمكم
هزت امها راسها وجلست تضحك على هبال بنتها
جلست سراب على اقرب كنبه بالصاله ورفعت سماعه التلفون وطلبت رقم عياده الاسنان وطلبت منهم يحولونها عالدكتور ماجد وجلست تنتظر دقايق رفعتها النيرس وقالت لها تنتظر شوي لان الدكتور عنده مريض وبعد اربع دقايق انتظار..
د/ ماجد بصوت ثقيل: مرحبا
سراب بارتباك: ه ه هلا دكتور.. لوسمحت بأخذ موعد
د/ ماجد: باسم مين؟
سراب: سراب عبدالله
د/ ماجد يراجع المواعيد عنده: اااا خلاص بحط يوم الاحد بعد عشره ايام يناسبك
سراب: لا دكتور أنا بعد يومين بكمل شهر شاده ابي موعد قريب بكره اوبعد..
د/ ماجد: والله المواعيد عندي فوول هاليومين وبعدها عندي مؤتمر خارج المملكه
سكتت سراب تنتظره يعطيها موعد بس هو ماتكلم
د/ ماجد: بسرعه اختي اختاري لك يوم أنا عندي مواعيد وناس
سراب تكلم نفسها ياهو مغرور وشايف نفسه: خلاص دكتور عطني موعد يكون بعد رجعتك
د/ ماجد ويحاول ينهي المكالمه: يوم الاربعاء 28/5
سراب ماعجبها الاربعاء تخاف تكون مرتبطه ولامعزومه: امم
د/ ماجد: يلا اختي فمان الله
بعد ماقفلت منه ارتفع ضغطها دقت على ديم تحكي لها اللي صار..
ديم: هههههههههههه
سراب: تضحكين انتي ووجهك احر ماعندي ابرد ماعندك
ديم: الرجال مشغول وانتي تتخيرين بالمواعيد
سراب: ديم مغرور شايف نفسه يتكلم من طرف خشمه
ديم: والله ماينعرف لكم اذا ضحك وعطى وجه قلتوا راعي بنات وخرابيط واذا صار رسمي قلتوا مغرور
سراب: أنا ماقلت ابي ادقها سواليف بس برضوا في اساليب ارقى من كذا بالتعامل
ديم: وسعي صدرك
سراب وتقلده: لااحلى شئ عندي مؤتمر خارج المملكه
ديم: هههههههههههههه تعالي بسألك حلووو هو؟؟
سراب: عادي مملوح اسمر
ديم: اليوم صار سالفه ضيقة صدري
وبدت تحكي لها عن عمتها والخطبه...
سراب: طيب انتي فكري بعقلك وخلي افكار المراهقين والاحلام على جنب ليه انتي رافضه الولد؟؟
ديم: هو عادي مافيه عيوب ظاهره ولافيه ذيك المميزات بس أنا مو متقبلته ماراح اقولك مثل باقي البنات احسه مثل اخوي ومن هالكلام لا.. بس مستحيل اوافق عليه
سراب: لحظه ديم... امي تناديني بكره نكمل نقاش بالسالفه..
ديم: اوكي مع السلامه

===========================

نزل وشكله حوسه توه صاحي من النوم ماكلم احد طلع من عندهم شكله معصب وبعد اقل من ساعه رجع من برى ومعه اخوه ياسر...
ام بدر: وش عندكم اصواتكم عاليه؟؟
ثامر: تخيل يبا ياسر ماخذ سيارتي ويسوق فيها بكل ثقه
ابوبدر بعصبيه: أنت متى بتصير عاقل؟؟!!!!!!
تركي: ليتهم حاجزينك عشان تتادب..
ثامر: تركي خذ مفاتيحك
ام بدر: تركي أنت عارف بالسالفه وساكت
ديم: وانا اشوفه ماتكلم ولاقال وش فيه ثامر؟؟
تركي: وش تبوني اخوفكم هذاه قدامكم مافيه إلا العافيه
ابوبدر: وش القصه كيف صار الحادث؟؟
ياسر: بسيط ماصار شئ
ام بدر: عادي فرحان بعمرك
ديم: اكيد بيفرح سايق سياره اليوم
ياسر: ايه الخطأ عليه مو علي
ثامر: صدم له واحد بزر المشكله يوم جاء المرور أنا جيت وقلت اني أنا اللي كنت اسوق عشان الاخ مامعه رخصه.. وحتى الثاني جاء ابوه وقال أنا اللي اسوق
ديم: ههههههههههههه صارت فلم
تركي: احمد ربك انك صادم بزر ولاكان توهقت وفتنوا عليك
ابوبدر: لاعاد اشوفك ماخذ سياره اخوانك
ام بدر: المفاتيح حطوهم بمكان مايعرفه
ثامر: أنا برمي المفاتيح قدامه او بحطهم فوق التلفزيون بس أنت جرب تاخذهم والله ماارحمك
تركي: لااتوقع انه تأدب بعد اليوم
ديم: يبا اليوم البنات بيجتمعون عند سراب المغرب عادي اروح؟؟
التفتوا عليها اخوانها وبعدها طالعوا بابوهم ينتظرون الرد منه
ابوبدر: روحي بس لاتتاخرين
تركي: وليه مايجتمعون عندنا؟؟
ثامر: صارت مهزله شوي وتاخذين سريرك عندهم
ابوبدر وهو قايم: يلااااااا صلاه تحركوا

==========================

نوف بغرفتها تكلم بجوالها اللي طبعا زي ماقلت لكم اهلها مايدرون عنه فجأه دخلت عليها اختها ريوف..
نوف تنتفض من الخوف دخلت الجهاز بالدرج: بسم الله الرحمن الرحيم طقي الباب قبل ماتدخلين
ريوف بنص عين: سمعتك تضحكين وتتكلمين استغربت قلت من عندك بالغرفه؟؟
نوف: الحمدلله والشكر من بيكون عندي
ريوف: اجل وش كنتي تسوين انتي ماعندك تلفون بالغرفه
نوف تصرف الموضوع: كنت اكلم بجوال امي
ريوف تتلفت: وينه جوال امي؟؟
نوف: اقول اطلعي وصكري الباب ترى مالي خلقك
ريوف: بعلم امي انك ماخذه جوالها
نوف: روحي علميها الله ياخذك
طلعت ريوف تنزل لامها وبسرعه اخفت نوف جوالها بمكان بين ملابسها وراحت تركض لغرفه امها جابت الجوال عشان تكتمل الخطه قدام امها وفعلا بعد شوي دخلت امها عليها وهي ماسكه الجوال تلعب فيه..
العنود: اووووف أنا كم مره قايلتلك لاتاخذين جوالي
نوف: دقيت على وحده بسالها عن محاضره بكره
العنود: مره ثانيه قبل ماتاخذينه استاذني.. وانا شكلي بحط عليه رمز القفل عشان محد يستخدمه غيري..
نوف: اوووف بس عيشه تقصر العمر
ريوف: احسن عشان ثانيه مره ان سالتك تجاوبين
نوف: اقول ضفي وجهك بس

======================

في الصاله قدام التلفزيون...
ديم: رجع المسلسل متابعته
ثامر: في مباراه بتجي بعد شوي
ياسر: مباراه مين؟؟
ديم: تلاقيه الدوري الايطالي ولاالانجليزي
تركي: طيب وش رافع ضغطك خليه يتابع
ديم: ابي المسلسل واذا جت المباراه رجعها
ثامر: روحي فوق تفرجي عليه
ياسر: التلفزيون اللي فوق محطوط منظر
ديم: أنت اطلع فوق
ثامر: اااااه بس متى تتزوجين من طلال ونفتك؟؟
ديم متفاجئه انهم كلهم عندهم خبر بالموضوع: ومين قالك اني موافقه
ياسر: ليش رفضتي؟؟
ديم: مالكم دخل؟.. وبعدين لو يخلصون الرجال كلهم مااخذت طلال
تركي: ليه ياديم وش فيه طلال أنا اشوفه شاب عادي مافيه شئ يعيبه عشان ترفضين
ثامر: وبعدين انتي مره مصدقه نفسك انك صغيره اللي كبرك كلهم متزوجين وعندهم عيال
ياسر: انتي كم عمرك اللحين صرتي عانس ولابعد؟؟
تركي بعصبيه: ثامر ياسر
طلعت ديم فوق والعبره خانقتهاواصدمت بامها قبل ماتدخل غرفتها..
ديم: يما شوفي عيالك يرفعون الضغط
ام بدر: وش فيكم بعد؟
ديم: يتحكمون فيني على بالهم بزر عندهم
ام بدر: اخوانك خايفين عليك
ديم: خايفين على من ايش؟؟.. ثامر يفلسف يقولي طلال تتزوجينه ويخربط علي
ام بدر: هم اخوانك مو عيال الجيران
ديم: يرفعون الضغط كل شئ يدخلون خشومهم فيه اللبس يتحكمون والطلعات يتحكمون واي شئ يخصني يتكلمون فيه المشكله ليته على سنع بس فرد عضلات
ام بدر: الله يصلحكم كلكم
ديم: يما بدر اذا قال شئ احترمه لانه ملتزم ويتكلم من ناحيه الدين لكن الباقين فلسفه على غير سنع.. أنا ان فكرت اتزوج واطلع من البيت ترى كله من عيالك
ام بدر: الله يعين عليكم.. هااا وش صار فكرتي بموضوع طلال؟؟
ديم: انتم وش فيكم على تحت طلال هنا طلال افتح التلفزيون طلال... طلال طلال كرهته من كثر ماسمعت اسمه حتى لو اول كنت موافقه برفضه كرهتوني فيه..
ام بدر: حنا ماراح نغصبك بس احسن صلي استخاره لاترفضين على طول
ديم: يصير خير...

==========================

الهنوف: كانك بتطلع اليوم ودني عند امي
سليمان: حتى لو بطلع ماراح اطول
الهنوف: لان الاسبوع اللي راح الجوهره ماجت واليوم هي عند امي
سليمان: على فكره كلمتي اخوك احمد يشوف لي واسطه عندهم بالبنك بدال ماادخل ازاحم العالم..
الهنوف: لمحت له بس شكله ماوده
سليمان: اخوك هذا ماعمره نفعنا بشئ
الهنوف: اييه متى مااشتهي تحرك
سليمان: ماعنده نيه يتزوج؟
الهنوف: ماقال شئ.. اسكت بس ديم بنت الجوهره خاطبها ولد عمتها وامها تقول شكلها ماتبيه
سليمان: يمكن ماارتاحت له
الهنوف: وش ماارتاحت دلع بنات بيصك عمرها ال 25 وهي ماتزوجت
سليمان: عادي كثير بنات بهالعمر ماتزوجوا
الهنوف: بس المفروض ماترد الناس من غير سبب
سليمان: انتي ماتزوجتي إلا وعمرك 27 سنه
الهنوف تفشلت: ايه صح كنت زيها اتدلع وارفض عشان كذا ابيها تتزوج
سليمان: من متى الحب لديم اخبرك ماتدانينها
الهنوف: بلاها تكره الواحد فيها
سليمان: بطلع اللحين ماراح اتاخر
الهنوف: خذ جنى معك
سليمان: الحمدلله منتب صاحيه رايح بقاله اخذها؟ عندي مشوار شوي وراجع
سكتت الهنوف وقعدت تكلم نفسها...

========================

ثامر وهو نازل نادتها امه
ثامر: هلا يما
ام بدر: الله يعافيك خذ ورقة المقاضي
ثامر باحراج: والله ما معي فلوس يا يما
ام بدر: ياوليدي بفهم أنت راتبك وين يروح؟؟.. كل اخر شهر تجي وما معك فلوس..
ثامر: يطير الراتب وبعدين وظيفتي على قدي براتب ثلاث الاف هذا تسمينه راتب..
ام بدر: والله لو أنت تكد على بيت وعيال ماطار بهالسرعه
ثامر: يما .. أنا ما قد اشتكيت ولا قد طلبت منكم ..؟.. الحمدلله أموري متيسرة
ام بدر: بس ابي اعرف وين توديهم؟
ثامر: هههههه عليك تسحيب يما
ام بدر: يا وليدي .. والله اني خايفة عليك .. ودي أعرف
ثامر وهو يحب راس امه: يالغالية ان شاء الله ما اصرفها اللي باللي يرضيك .. واذا عالمقاضي هاتيها .. اتسلّف حقها من واحد وارجعها له أول الشهر ..
ام بدر وهي قايمة: لا .. لا تتسلف ولا شي .. تدري أنا دايم اجلس مع نفسي واقول الولد هذا اكيد مسوي لي عمل ويخليني ماارفض له طلب .. وكل ما فتحت معك موضوع يسكره..
ثامر: هههههههههههههههه لوبسوى عمل كان خليتهم يزيدون راتبي

======================

يدق جوالها جنبها ماكانت بترد مالها خلق لاحد بس لما انتبهت للنغمه كانت النغمه الخاصه بخالها ردت عليه مع انها متضايقه..
احمد: الوووو
ديم: هلا خالي
احمد: سلامات وش فيه صوتك كذا.. ثانيه مره لاتردين تخرعين العالم
ديم: الله يسامحك ابيك عون صرت فرعون
احمد: وش فيك؟؟
ديم: فيه غيرهم..
احمد: اخوانك؟!
ديم: ايه رفعوا ضغطي
احمد: ياشيخه خلاص المفروض انك تعودتي على اسلوبهم يعني مشي
ديم: مره مرتين اطنش بس مو دايم مليت
احمد: قولي وش السالفه
قعدت تحكي لخالها السالفه وهي متحمسه والعبره خانقتها وخاصه لما قالت له يقولون عانس..
احمد: هههههههههههههههه الله يقلع ابليسه تلقينه هذا ثامر
ديم: ايه هو وياسر القهر انهم اصغر مني
احمد: ياسر بزر ماعليك منه بس ثامر خليه علي أنا اوريك فيه
ديم: تركي هزأهم وانا طالعه اسمعه بس برضوا مابرد حرتي..
احمد: تصدقين بالعكس حلوو ان البنت تتزوج بعد ماتتخرج يعني تتمتع بشبابها اول أنا عن نفسي ابي وحده مخلصه دراسه يعني شوفي لي وحده من دفعتك...
ديم: اول خذ حقي منهم وابشر بالعروس
احمد: اقول ماعليك منهم بكره أنا عازمك عالعشاء اختاري المطعم اللي تبينه والحساب عليك لاني مفلس...
ديم: هههههههه المطعم اختاره والحساب على أنت مره ديموقراطي ياخالي
احمد: خلاص بكره الساعه 9 خليك جاهزه
ديم: ان شاء الله
احمد: يلا مع السلامه ولاتعلمين احد اللحين يجون ينشبون اخوانك
ديم: مع السلامه

============================

بسمه: مارد عليك خالي على سالفه خطبه طلال
ام طلال: لا والله إلا الان وبعدين تونا مالنا إلا اسبوع
بسمه: واضحه يما شكلها ماتبيه
ام طلال: يمكن البنت تفكر
بسمه: تفكر بايش يما طلال مو غريب ولد عمتها اكيد تعرفه المسأله مو معقده لهالدرجه
سمعوا صوت الباب الخارجي ينفتح
ام طلال: اسكتي يمكنه اخوك ماابيه يحس بشئ
بسمه: تكفين اللي ميت عليها ماهمته اصلا
طلال: السلام عليكم
الكل: وعليكم السلام
بسمه: جوعانه بروح المطبخ لعل وعسى الاقي شئ اكله
طلال: ليه بمجاعه قاعدين ماراح تلقين اكل
ام طلال: ماعليك منها وش صار عالبعثه حقتك ماردوا عليك
طلال: شاورت كم واحد من العيال كلهم يقولون كمل الماجستير هنا احسن والدكتواره خلها برى
ام طلال: اللي يريحك اهم شئ ماتسافر إلا وحرمتك معك
طلال: هههههههه هذا اهم شئ عندك
ام طلال: اكيد الواحد هناك بغربه اكيد يبي له وحده تونسه
طلال: انتي قلتيها يما أي وحده مو شرط ديم
ام طلال: والله ان البنت ماتتفوت احبك واحبها ودي تصير من نصيبك
طلال: بس اذا ربي ماكتب لاتضيقين صدرك يما
ام طلال: الله يكتب اللي فيه خير

==========================

تحس بالملل حياتها صارت روتين قاتل مافي شئ جديد اليوم مثل امس وامس مثل اليوم وماتتوقع ان بكره راح يتغير شئ قعدت تقبل المجلات مافيهم شئ يشد رمتهم عالطاوله وهي تتافف...
سعد يطقطق بالكيبورد: سلامات وش الافففففف اللي طالعه من قلب
بشاير: ملل
سعد: طالعي التلفزيون
بشاير: بس أنا هاذي حياتي تلفزيون مجلات ماكاني متزوجه
سعد: احمدي ربك
بشاير: حامدته وشاكرته بس أنا زوجتك لي حقوق عليك بعد
سعد: لحظه
بشاير: اكلمك وتقولي لحظه
سعد يلتفت لها: تغارين من الكمبيوتر
بشاير بدلع: ايييييه
سعد: ههههههههههههههه ياعمري
بشاير بقهر: بنزل تبي شئ
سعد: وين بتروحين؟؟
بشاير: وين بروح اكيد عند خالتي في احد غيرها اجلس معه
سعد: طيب روحي غيري جوو عند اهلك
بشاير: استحي اطلع من البيت كل يوم وخالتي موجوده
سعد: عادي امي ماراح تمنعك.. أنا زوجك وماعندي مانع
بشاير: الحمدلله انك اعترفت انك زوجي كنت احسبك ناسي

========================

في البيت الكبير بيت جدتهم.. كانت الجوهره والعنود عند امهم

الجوهره: اليوم البيت هدوء
العنود: حلو الواحد يتمتع كم ساعه من غير عيال وازعاج
ام احمد: اللحين تقولين كذا وانتي ماعنك إلا ثلاث اجل وش تقول اختك
العنود: ثلاث بس جنانوه مهبلين فيني كل ماقلت كبروا كبر همهم معهم
ام احمد: الله يصلحهم
ام بدر: والله ان مضيق صدري ثامر
العنود: خييييير يما عسى ماشر
ام بدر: مدري راتبه يستلمه من هنا ويصرفه من هنا مدري وين يودي الفلوس واذا سالته مايجاوبني
ام احمد: هذولا الشباب يسحبون تسحيب تقولين ياكلون الفلوس
العنود: بس يالجوهره ثامر موظف راتبه وين يوديه
ام احمد: لاتهبلين باختك
ام بدر: ولو انهم يصرفهم على نفسه واحس بهالشئ كان ماقلت شئ بس احيانا ينقصه فلوس ويجي ياخذ مني والله اني خايفه على هالولد
العنود: الله يستر
ام بدر: ودي اتكلم مع احمد هو علاقته مع ثامر قويه اكيد يدري
ام احمد: انتي لاتضيقين صدرك واذا جاء اخوك اسأليه

=========================

ديم تكلم سراب بالتلفون...
سراب: ملل
ديم: الحال من بعضه
سراب: ديوم حبيبتي تعالي عندي
ديم: اللحين!!!!!!!!
سراب: ايه مافيها شئ قولي لامك
ديم: منتب صاحيه اولا امي نايمه ثانيا شوفي الساعه 11 ونص مافي امل
سراب: المشكله حتى أنا عزيز محلفني مااجي عندكم إلا وامي معي
ديم: كل ذا عشان اخواني لاابشري تركي وثامر طالعين مع خالي واخوياهم للبر كاشتين وماراح يجون إلا بكره وياسر وريان نايمين
سراب: والله اني مخنوقه ابي اطلع بس أنا قلت لك هو محلفني
ديم: صعبه والله صعبه لوبيدي جيت بس مااقدر
سراب: عندي لك طريقه تطلعين فيها.. بس خلى عندك روح مغامره ووافقي
ديم: الله يستر من افكارك
سراب: مو انتي تقولين اخوانك طالعين يعني مافي امل يرجعون الليله
ديم: ايه
سراب: أنا والله لو وضعي زي وضعك كان جيت بس أنا باي لحظه بيجي عزيز البيت وماراح يلقاني وبيعرف

قفلت ديم بعد مااقنعتها بتنفيذ الخطه مع انها كانت متردده بس بالاخير قالت ملل والليل طويل خليني اروح عندها واوسع صدري بس قبل كل شئ دقت على خالها تتاكد ان اخوانها معه وانهم ماراح يرجعون إلا بكره.. وراحت شيكت على امها وابوها واخوانها الصغار الحمدلله لقت الكل نايم إلا ياسر فقالت لسراب تنتظرها ساعه عبال ماينام اخوها ..
دخلت غرفه تركي وطلعت منها بشكل ثاني كانت لابسه ثوب وشماغ متلطمه فيه وشكلها يضحك لان الثوب طالع اطول منها اللي يشوفها يصدق انها ولد خذت جوالها ومفاتيح البيت ودخلت غرفتها تتنتظر ياسر ينام عشان تنزل

=========================

في البر الشباب بالمخيم مجتمعين وكان عددهم كبير نوعا ما فوق ال30 شخص وكان تركي وثامر وخالهم احمد موجودين وهم تقريبا طلعاتهم وروحاتهم مع بعض فمن الطبيعي يكونون لهم نفس الاصدقاء.. ثامر ماكان على بعضه جالس هادئ ولايتكلم مو من عادته
احمد: سلامات وش فيك؟؟
ثامر: ابد بس صداع خفيف
احمد: افاااااااااا وحنا الليله قلنا المندي ماراح يضبطه لنا إلا ثامر
ثامر: اشتغل عندك أنت وياه
احمد: هههههههههههههههه
ثامر وهو واقف: معك بندول
احمد: لاوالله.. وين رايح؟
ثامر: بجلس بالسياره شوي ان ماخف الصداع برجع البيت تكفى دور لي مع الشباب بندول
احمد: اوكي أنت رح وانا بشوف لك
وبعد ماقام سألوا الشباب عنه وقالهم احمد انه تعبان وبيرتاح شوي وقام واحد منهم جاب له بندول عشان يخفف عنه الم الراس ويرجع يكمل السهره معهم..
تركي: وين المويه ياشباب احد يبلع حبوب من غير مويه
راح تركي للسياره وعطى ثامر الحبه والمويه..
ثامر: راسي صاكني شكلي برجع البيت
تركي: منتب صاحي الطريق طويل يبيلك حول الساعه عشان تاصل البيت
ثامر: مو مشكله وبعدها برتاح ابي انام
احمد ينادي من بعيد: تركي
اشر له تركي يجي عندهم....
احمد: وش السالفه؟
تركي: بيرجع البيت والمشكله كلنا جايين بسيارتك
احمد: مو مشكله السياره نرجع مع واحد من العيال بس تقدر تسوق وأنت مصدع
ثامر: عادي
تركي: انتظر نص ساعه اذا ماخف روح البيت

=============================

نوف هالانسانه طيبه طيبه فيها طيب مو طبيعي بس مشكلتها انها عاشت ببيئه مافهمتها كانت تشعر بفراغ عاطفي كبير حاولت تتمرد لما لقت لها شخص يحتويها لكن للاسف ماكان هالشئ بطريقه صحيحه
بغرفتها مقفله على نفسها الباب زي العاده امها كانت شاكه بالوضع بعد ماقالت لها ريوف انها تسمع اصوات ضحك وهمس اذا مرت من الغرفه..
قربت امها من الباب وسمعت صوت اقرب للهمس قربت اكثر بتتاكد بس نوف حست ظلال من تحت الباب وتداركت الوضع وشغلت المسجل بصوت واطئ..
امها تبي تدخل عليها بس ودها يكون شكوكها بمكانها عشان مايصير صدامات مع بنتها مثل العاده فتحت الباب كان مقفل وجلست تطق بقوه فتحته نوف...
العنود بنظرات شك تتلفت بالغرفه وكنها تدور شئ: وش كنتي تسوين
نوف ببرود: جالسه عالسرير
العنود: اذا كلمتك ردي علي بأدب
سكتت نوف...
العنود: أنا سمعتك تتكلمين
نوف: اكلم مين ياحسره
العنود: لوعندي الجواب ماسألتك
نوف: المسجل كان يشتغل وشكلك تحسبينه صوتي
العنود: قسما بالله ان ماكنتي صريحه معي لاشيل يدي منك واخلي ابوك واخوك يتفاهمون معك
نوف: يتفاهمون على ايش؟
العنود: تكلمي اش الصوت اللي قبل شوي لاتقولين انه جوالي لان جوالي بجيبي والثابت شايلته
نوف: فتشي الغرفه اذا كنتي شاكه ومو مصدقتني
العنود: مفتاح الغرفه أنا بخذه وان كنتي بتلبسين البسي بالحمام وغيره ماراح تحتاجين المفتاح
نوف: الله واكبر هي وقفت عالمفتاح كل شئ مصادرته مني
عطت بنتها نظره استحقار وطلعت..

===========================

نزلت الحوش وهي تنتفض تحس ان حركتها مالها داعي بس هاذي خطط سراب اللي ماتخرش الميه..
فتحت باب الشارع وترددت انها تطلع بس بالاخير وتحت اصرار سراب اللي جالسه تراسلها بالجوال قررت انها تخوض التجربه اول ماصكرت باب البيت وطلعت للشارع تمشي لبيت سراب اللي قدامهم وهي باشد حالات الخوف حست ان احد وراها خافت تلتفت وفجأه سمعت واحد ينادي..

: ثامر ... ثامر

وبهاللحظه تجمدت من الخوف وكانت تنتفض بشكل غير طبيعي خافت تلتفت لانها لوشافت اللي في بالها يمكن يغمى عليها من الصدمه

============================
الرجوع الى أعلى الصفحة اذهب الى الأسفل
نهله
مــــــشــــرفة
مــــــشــــرفة
avatar

الهواية :
المهنة :
المزاج :
الدولة :
انثى عدد المساهمات : 515
تاريخ التسجيل : 09/12/2009
mms :

مُساهمةموضوع: رد: مازال الليل يعاندنى   الأحد مارس 28, 2010 12:12 pm

الرجوع الى أعلى الصفحة اذهب الى الأسفل
golden eyes
نــائـبة الـمديـر العام
نــائـبة الـمديـر العام
avatar

الهواية :
المهنة :
المزاج :
الدولة :
الاوسمة :
انثى القرد العذراء عدد المساهمات : 2045
تاريخ التسجيل : 07/12/2009
العمر : 24
mms :

مُساهمةموضوع: رد: مازال الليل يعاندنى   الخميس أبريل 15, 2010 1:32 pm








(̅_̅_̅_̅(̅_̅_̅_̅_̅_̅_̅ توقيعى اللى تحت دة _̅_̅_̅_̅()ڪے :






ShOSho



و
تبقى لغة العيون سراً لايعرفه أحد ولايفصح عنه لسان

الرجوع الى أعلى الصفحة اذهب الى الأسفل
 
مازال الليل يعاندنى
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
•·.·`¯°·.·• (حـيــاه ســعــيــدة) •·.·°¯`·.·• :: المنتدى الادبى :: القصص والروايات-
انتقل الى: